ការព្យាបាលជម្ងឺមហារីកក្រពេញប្រូស្តាតដោយប្រើវិធីអ័រមនភេទឈ្មោល Testosterone suppression ក្នុងការអន្តរាគមន៍

• Facebook
• Instagram
• ប្លក, រូបភាព
• Telegram
• WhatsApp
• LinkedIn
• សំបុត្រ

ខ្ញុំបានអនុវត្តន៍ការងារពាក់ព័ន្ធនឹងជម្ងឺទាំងនេះក្នុងប្រទេសកម្ពុជាអស់រយៈពេលជាង 5ឆ្នាំមកហើយ ខ្ញុំបានសង្កេតឃើញថាអាត្រានៃអ្នកជម្ងឺមហារីកក្រពេញប្រូស្តាតមានទម្រង់កាន់តែខ្ពស់ឡើងសម្រាប់ប្រជាជនក្នុងស្រុកក៏ដូចជាជនបរទេសដែលមកធ្វើការផងដែរ។ សន្ទុះហាក់កើនឡើងព្រមគ្នាតែម្តង។ អ្នកដែលមានបញ្ហាជម្ងឺមួយនេះ ពួកគាត់បានស្វែងរកទីកន្លែងដែលផ្តល់ការព្យាបាលដែលមានបច្ចេកទេសទំនើបនិងសេវាកម្មល្អសម្រាប់ពួកគាត់។ ក្នុងប្រធានបទមួយនេះយើងនឹងផ្តោតការយកចិត្តទុកដាក់ទៅនឹងវិធីការព្យាបាលជម្ងឺនេះដោយប្រើវិធីអ័រមនភេទឈ្មោលដើម្បីអន្តរាគមន៍ទៅលើការវិវឌ្ឍន៍នៃជម្ងឺ។

ជាបឋម យើងត្រូវដឹងថាអ័រមនភេទឈ្មោលនេះដើរតួរយ៉ាងសំខាន់ពាក់ព័ន្ធទៅនឹងកម្រិតភាពកាចនៃជម្ងឺមហារីកក្រពេញប្រូស្តាត។ ដោយយោងលើតួនាទីនៃការបង្ករនេះហើយ ទើបយើងត្រូវរកគ្រប់វិធីដើម្បីទប់ស្កាត់លើបញ្ហាអ័រមននេះ។ កាលពីអតីតកាល វីធីក្នុងការទប់ស្កាត់និងគ្រប់គ្រងអ័រមនភេទឈ្មោលនេះ យើងអាចធ្វើបានត្រឹមតែមួយវិធីប៉ុណ្ណោះ នោះគឺការវះកាត់ពងស្វាសចោល។ វិធីវះកាត់មួយនេះយើងអាច់ធ្វើការទប់ស្កាត់និងបញ្ឈប់ការបញ្ចេញនៃអ័រមនភេទឈ្មោលបាន ពីព្រោះយើងដឹងហើយថាពងស្វាសគឺប្រៀបដូចជារោងចក្រផលិតអ័រមនភេទឈ្មោលអញ្ចឹង។ នៅពេលដែលអ្នកជម្ងឺត្រូវបានកាត់ពងស្វាសចេញ មានការសិក្សានិងសេចក្តីរាយការណ៍បានបញ្ជាក់ថា ការអនុវត្តន៍ការព្យាបាលដោយកាត់ពងស្វាសរបៀបនេះវាបានធ្វើអោយអ្នកជម្ងឺប្រឈមទៅនឹងរបួសផ្លូវចិត្តហើយពួកគាត់បានបាត់បង់ទំនុកចិត្តនៅពេលពួកគាត់បានបាត់បង់ពងស្វាសរបស់ខ្លួន។

បច្ចុប្បន្នភាពអ្នកបច្ចេកទេសវេជ្ជសាស្រ្តបានធ្វើវណ្ណកម្មថ្មីមួយដែលវាបានផ្តល់ភាពអំណោយផលនឹងភាពប្រាកដនិយមពាក់ព័ន្ធនឹងជម្ងឺនេះ ដោយការប្រើរូបមន្តនៃការសង្កត់ផ្ទាល់លើអ័រមនភេទឈ្មោលកុំអោយវាមានសកម្មភាពក្នុងការបង្ករ។ វណ្ណកម្មនៃការប្រើរូបមន្តសង្កត់ទៅលើអ័រមនភេទឈ្មោលមួយនេះ គឺរៀបចំឡើងយដោយការចាក់ថ្នាំចូលតាមសាច់ដុំក្នុងចន្លោះពី 1ខែទៅដល់1ឆ្នាំនៃការចាក់ថ្នាំព្យាបាល។ ការព្យាបាលដោយវិធីការចាក់ថ្នាំដើម្បីទប់ស្កាត់អ័រមនឬសង្កត់អ័រមននេះ មានការបារម្ភបន្តិចបន្តួចក្នុងការករណីដែលវាមិនសម្រេចផលបាន 100% ក្នុងលក្ខខ័ណ្ឌនៃការបារម្ភនេះឯងទើបតម្រូវអោយអ្នកជម្ងឺមកទទួលការពិនិត្យអោយបានទៀងទាត់នូវកម្រិតសេរ៉ុមរបស់អ័រមនភេទឈ្មោលតាមកាលកំនត់។ ខាងក្រោមនេះជាតារាងគំរូប្រភេទថ្នាំចាក់នីមួយៗដែលបានប្រើប្រាស់នៅក្នុងទីផ្សារ។

ឧទាហរណ៍នៃ ការព្យាបាលដោយប្រើថ្នាំ Androgen deprivation

1. Enantone
   • Generic name: Leuprolide
   • 95%-98% អាចនឹងសង្កត់កម្រិតអ័រមនភេទឈ្មោលបាន (Consider as < 50 ng/dl cut-off point)
2. Zoladex
   • Generic name: Geserelin
   • 96% អាចនឹងសង្កត់កម្រិតអ័រមនភេទឈ្មោលបាន (Consider as < 20 ng/dl cut-off point)

ជាធម្មតាតាមការអនុវត្តន៍ជាក់ស្តែងរបស់ខ្ញុំគឺក្នុងចន្លោះ3ខែក្នុងការប្រើប្រាស់ថ្នាំចាក់អោយបានទៀងទាត់និងពិនិត្យតាមដាន។

1. PSA
   • Prostate specific antigen
   • ខ្ញុំបានប្រើបាស់ PSAពីរដងក្នុងការតាមដានសកម្មភាពការវិវឌ្ឍន៍នៃមហារីកក្រពេញប្រូស្តាត។
2. Testosterone level
   • ពិនិត្យមើលថាតើការចាក់ថ្នាំអាចគ្រប់គ្រងនិងសង្កត់ទៅលើកម្រិតចរាចរណ៍នៃសេរ៉ុមអ័រមនភេទឈ្មោលបានប៉ុណ្ណា។
   • ខ្ញុំបានប្រើប្រាស់កម្រិត< 50 ng/dl as cut-off point តាមការណែនាំរបស់បណ្តាញ National Comprehensive Cancer Network (NCCN)

បច្ចុប្បន្នភាពនៃការអនុវត្តន៍ព្យាបាលជម្ងឺមហារីកក្រពេញប្រូស្តាតត្រូវបានធ្វើការកែតម្រូវ(ធ្វើបច្ចុប្បន្នភាព)រៀងរាល់៣ខែម្តង។ ទាំងនេះជាភារកិច្ចស្នូលរបស់វេជ្ជបណ្ឌិតផ្នែកមហារីកនៃប្រព័ន្ធទឹកនោមដែលគួរតាមដាននឹងធ្វើបច្ចុប្បន្នភាពទៅលើចំនេះនិងជំនាញរបស់ខ្លួន។ អ្វីដែលខ្ញុំបកស្រាយពីខាងដើម វាគ្រាន់តែជាធាតុមួយផ្នែកតូចនៃការគ្រប់គ្រងនឹងព្យាបាលជម្ងឺមហារីកក្រពេញប្រូស្តាត។ ប្រសិនលោកអ្នកមានសំនួរឬចម្ងល់ពាក់ព័ន្ធនឹងជម្ងឺនេះ សូមលោកអ្នកស្វែងវេជ្ជបណ្ឌិតផ្នែកជម្ងឺមហារីកនៃប្រព័ន្ធទឹកនោមដែលមានចំនេះនិងជំនាញច្បាស់លាស់ក្នុងការធ្វើកិច្ចពិភាក្សា។ ជួបជាមួយខ្ញុំបន្តទៀតសម្រាប់ប្រធានបទក្រោយទៀត។

អ្នកអាចចូលមើលគេហទំព័រផ្លូវការរបស់ខ្ញុំ នៅទីនេះ.